𝐷𝑖𝑛𝑎𝑔𝑎𝑡 𝐼𝑠𝑙𝑎𝑛𝑑𝑠– Miarangkada na ang 5th Management Committee Meeting (MANCOM) sa Department of Education (DepEd) Caraga Region nga gipahigayon ngadto sa Kamanting Grill and Restaurant, Sta. Cruz, San Jose, Dinagat Islands, kagahapong adlawa, Agusto 12, 2024.
Kini nga panagtigom naghiusa sa Schools Division Superintendents, Assistant Schools Division Superintendents, Regional Functional Division chiefs, ug uban pang focal persons gikan sa tibuok Caraga Region aron pagahisgutan ug planohan ang mga lakang para sa sektor sa edukasyon niining rehiyon.
Si Caraga Regional Development Council Chairperson ug Dinagat Islands Governor, Hon. Nilo P. Demerey, Jr., MPM anaa sa pagbukas sa aktibidad nga mainiton usab nga giabi-abi ang mga partisipante sa maong kalihukan. Si Demerey nagpamatuod pag-usab sa iyang hugot nga suporta sa mga adbokasiya sa DepEd, ilabi na sa pag-amuma sa mga estudyante. Gipasiugda usab sa Gobernador ang kamahinungdanon sa panaghiusa ug iyang giawhag ang tanan sa pagtinabangay aron masiguro nga matag-bata sa Dinagat Islands ug sa tibuok rehiyon sa Caraga makaabot sa ilang hingpit nga potensyal.
Anaa usab ang 2024 National Science and Technology Fair nga mga kampyon gikan sa PDI nga sila Kurt Lawrence B. Cuaton, Ehdraemrahnt H. Castro, ug Kriscel Mae J. Rollo, diin nagpresentar sa ilang research paper nga, “Spatial Modelling on Suitable Areas for Shallow Tube Well (STW) in the Province of Dinagat Islands: A GIS Approach.”
Gihisgotan usab ang pagpuno sa mga bakanteng posisyon sa departamento, pagpahapsay sa mga proseso sa pag-hire, pag-assess sa pagpahigayon sa mga klase, ug uban pa. Kini nga mga hilisgutan mahinungdanon sa pagpauswag sa kalidad sa edukasyon ug pagsiguro sa hapsay nga operasyon sa mga inisyatibo sa DepEd Caraga. Nagpadayon karong adlawa, Agosto 13, 2024 ang diskusyon sa nahabiling agenda. Ang Schools Division sa Dinagat Islands, pinangulohan ni SDS Florence Almaden ug sa iyang Technical Working Group, maoy nagdumala sa maong kalihukan uban sa pakigtambayayong sa Provincial Government sa Dinagat Islands ug Remedy Aksyon Center. Magtapos ang 5th Deped Caraga ManCom Meeting ugmang adlawa, Agosto 14, 2024.
#REMEDYsaEDUKASYON#GovDemereyAtYourServicePo
