Menu

CONCRETING OF ROADS CONNECTING THE BARANGAYS OF GIBUSONG ISLAND

Pormal na nga gilusad ang groundbreaking ceremony alang sa pagkongkreto sa mga karsada nga magsumpay sa tulo ka barangay sa Gibusong Island nga mao ang Helene, Liberty, ug Magsaysay sa lungsod sa Loreto.
Nikabat ang maong proyekto sa kantidad nga P17,991,528.85 gikan sa 20% PDF 2021 nga aduna’y reference number sa infrastructure 2021-15 nga proyekto sa Provincial Government sa Dinagat Islands.


Sa mensahe ni Gov. Kaka kini nga proyekto dugay ng nakaplano ug usa sa mga prayoridad nga gikinahanglan ma-implementar aron mapadali ang paglihok sa katawhan ilabi na sa pagtungha sa mga kabataan ug mapaayo ang kalidad sa ilang panginabuhian ug dili maglisod sa pagdeliver sa ilang mga produkto.


Usa lamang kini sa mga natuman nga mga proyekto diin nagsiguro nga mahatagan ang katawhan sa mas maayo nga kahimtang nga usa sa iyang gisaad kaniadtong anaa pa siya sa Kongreso isip usa ka Congresswoman. Ang Gibusong Island iyang napabutangan ug sugang dagitab o electricity lakip na usab niini ang circumferential road o kalsada nga iyang napondohan alang sa pagpatuman niini.


Isip usa ka gobernor gitinguha usab niya nga mapadayon kini nga proyekto ug mahatag ang dekalidad nga kinabuhi sa mga katawhan sa Gibusong nga nakigbisog nga gipaglaban ang isla kaniadto sa mining. Sa pakigpulong sa mga kapitan sa matag barangay sila malipayon sa paglusad sa maong proyekto nga dugay na nilang gipangandoy.
Gipadangat usab nila ang uban pang gikinahanglan nga mga proyekto ug programa alang sa pagpalambo sa ilang dapit nga dako ug ikatabang sa ilang komunidad.


Pipila sa ilang nasabutan ang pagpatuman sa mga proyekto nga mangroves plantation sa Barangay Magsaysay, pagtukod ug bag-ong barangay hall sa Liberty ug pag-ayo sa covered court sa Barangay Helene nga makamugna ug dugang panginabuhian sa katawhan.


Kauban ni Gov. Kaka sa groundbreaking sila Board Member Noli Abis (District 2), Lyn Dialde (District 1), ex officio Board Member Absalon Colandog (Philippine Councilors League), kauban ang kinatibuk-ang pwersa sa mga buhatan sa Kapitolyo ug ang hugot nga suporta sa mga kawani sa Department of Environment and Natural Resources (DENR) nga adunay dakong kalambigitan sa pagpatigayon sa proyekto.


Anaa usab ang presensya sa mga barangayanon nga gipangunahan sa mga Kapitan nga sila Manuel O. Rita Jr. (Magsaysay), Benjamin D. Abellano (Liberty), ug Glenito C. Cabantoc (Helene) kauban ang uban pang opisyal sa ilang matag komunidad.

share

Share on facebook
Share on twitter