Menu

OPENING OF PISTA SA DINAGAT ISLANDS (KAADLAWAN NAN PROBINSYA DAY 1)

Produktibo nga gisugdan sa Provincial Government nga gipangunahan ni Governor Kaka Bag-ao ang pagsaulog sa Pista sa Dinagat Islands. Mao kini ang Day 1 sa ika-15 nga Anibersaryo o Crystal Anniversary sa probinsya nga aduna’y tema nga nga, “Kinabuhi ug Panginabuhian sa Katawhan, Panalipdan! Tul-id nga Pangagamhanan, Katungod sa Katawhan!”

Nagkadaiyang produkto ang gipasundayag sa matag booth sa tanang munisipyo ug susama usab sa mga stall nga aduna’y ubay-ubay nga mga produkto nga anaa makita sa Kalikasang Buhay Park.

Gipasiugdahan sa Kalikasang Buhay Park Rangers ang doxology ug Philippine National Anthem. Kini nga mga Park Ranger nadiskubre niadtong nakalabay nga Charter Day gumikan sa imahinasyon ni Gov. Kaka nga mahataga’g oportunidad nga makakat-on ug magtubo nga partner sa probinsya sa pagtipig sa kinaiyahan ang mga kanbatan-onan.

Maabi-abihon nga gipaabot ni Office of the Provincial Agriculturist – OIC Marlon E. Cueco ang iyang mensahe sa gihimong kalihukan kung diin matod pa niya nga si Gov. Kaka mao’y nakahuna-huna nga himuong fiesta ang motif sa Charter Day. Tungod kini kay nakita niya nga dugay nang gihikaw sa mga katawhan ang pagsaulog sa pista gumikan sa pandemyang nasinati. Apan, kinahanglan nga sundon sa matag usa ang physical distancing ug uban pang health protocol aron maprotektahan ang kaugalingon.

Usa ka pagsaulog ang Pista isip espiritu sa komunidad nga nagkahiusa, usa usab kini ka panahon nga gigamit sa mga tawo ang ilang katungod aron ipadayag ang ilang kalipay. Paghinumdom usab kini sa kagahapon ug panulundon – ug sa susama nga oras, usa ka koleksyon sa mga pagpadayag sa paglaom nga natuman ang mga pag-ampo alang sa usa ka labing maayo nga ani, alang sa maayong pakuha sa isda, alang sa himsog nga kinabuhi, ug kaugmaon alang sa tanan. Ang mga produkto nga gipakita kaniadto sa Agri-Trade Fair mao’y makita karon sa Pista sa Dinagat Islands. Ang fair kaniadto, fiesta na karon sa probinsya.

Gidasig usab ni Engr. Cueco ang tanan nga suportahan ang mga mag-uuma, mangingisda, ug gagmay nga negosyante sa ilang mga produkto, kung diin dako sila ug kontribusyon sa probinsya ug mga katawhan. Sa nilabay nga katuigan, makita nato kung unsa kataas ug kalayo ang panahon nga atong naagi-an sukad sa pagpasa ug pagpamatuod sa Republic Act No. 9355 nga gisulat ni kanhing Gobernador Glenda B. Ecleo.

Gipresenta ni Provincial Cooperative Development Officer Alvin Dela Cruz ang keynote speakers alang sa pag-abli sa Pista sa Dinagat Islands nga sila Bernadeth J. Supero sa Rita Glenda Rural Improvement Club, Alfred P. Ebra sa Libjo Poblacion Payao Fisherfolks Association, ug Luzviminda “Tamsey” F. Rama sa business and service sector.

Ang ilang tagsa-tagsa nga mga sektor mao ang labing naapektuhan tungod sa pandemya. Apan bisan pa man sa ingon ana, ang ilang mga sektor dinhi sa Dinagat Islands ana sa lahi nga kaso. Sila ang nibarog isip atong food security frontliners. Sila ang naghimong driver sa atong lokal nga pang-ekonomiya aron magpadayong buhi kini ug makaya ang gisagubang nga mga problema.

“Isip usa ka mag uuma, mapasalamaton kami kung abunda ang among abot ug harvest. Kay buot pasabot niini dugang nga income sa among panginabuhian. Tungod sa mga programa ug assistance sa Department of Agriculture, Provincial Government pinaagi sa Office of the Provincial Agriculturist (OPAG) nahatagan kami nga mga mag-uuma sa Barangay Rita Glenda ug mga production inputs. Kami nga mga membro sa Rita Glenda – Rural Improvement Club (RIC) sa Munisipyo sa Basilisa nalipay ug dako sa walay pu-as nga pag-assist sa mga mag-uuma nga mao’y prayoridad sa atong probinsya,” sigon pa ni Supero.

Matod pa ni Ebra, “Tungod sa among adbokasiya nga mamentinar ang pag-tipig sa among kadagatan, akong ikapasigarbo sa tanan nga ang among asosasyon mobuhat ug coastal clean-up ug mangrove planting alang sa kasaulogan sa among unang anibersaryo sa pagkamugna. Manghinaut ako nga usa kini ka mamahimong pagtulun-an ilabi sa atong mga kaubanang mananagat, nga unta ma-duplicate ang among mga maayong gipanghimo ug kami mopabilin gihapon nga mamahimong partner sa atong Municipal and Provincial Government alang sa kalambuan sa bag-ong Dinagat!.”

Matod pa ni Rama, “Usa sa mga programa nga giimplementar sa probinsya ang Tabo sa Kapitolyo. Tungod niini nahatagan ug maayo ug dako nga oportunidad and mga mag-uuma, mananagat, mga online sellers, mga gagmay nga negosyante, ug uban pa aron maka baligya sa ilang mga kaugalingong abot ug maka income ug maka sustener sa pangadlaw-adlaw nga panginahanglanon. Dako ang akong kalipay, kay pinaagi sa Tabo, nag-padayon ang among operation sa among gagmay na negosyo, kung diin nakahatag pud kami ug job opportunity sa mga nagkinahanglan ug trabaho. Dako gayud ang natabang sa Tabo sa Kapitolyo sa amoa, na-expand ang amoang operation, nahiduol, ug accessible ang palaliton sa mga katawhan. Ako naga-awhag sa mga gagmay’ng negosyante nga moapil sa Tabo sa Kapitolyo aron ma-experience pud ninyo ang benepisyo nga among nadawat sa pag-participate sa maong activity. Kini nga programa sa Probinsya alang sa tanan. sigon pa gani ni Gov. Kaka “Walang maliit, walang malayo, lahat mahalaga’.”

Sa katapusang bahin, pormal nga gideklara ni Vice Governor Nilo P. Demerey, Jr. ang pag-abri ug pagsugod sa Pista sa Dinagat Islands.

share

Share on facebook
Share on twitter