Menu

TURNOVER CEREMONY OF GRAVITY-DRIVEN IRRIGATION SYSTEM PROJECT

Gi-turnover na ang duga’y nang gipangandoy nga gravity-driven irrigation system project sa mga mag-uuma sa Barangay Rita Glenda, Basilisa nga anaa nahimutang sa Jamot Farm.


Usa lamang kini sa pipila ka proyekto sa Provincial Government nga gihataga’g katumanan sa pagpanguna ni Governor Kaka Bag-ao pinaagi sa Office of the Provincial Agriculturist (OPAG) nga kung diin ang mga mag-uuma mao’y pinakaunang nahimong katimbang sa pagsiguro nga aduna’y pagkaon ang mga Dinagatnon ilabi na karon nga aduna’y pandemya COVID-19.


Nagkantidad ang maong proyekto sa P 474,094.68 gikan sa general fund sa Provincial Government diin gisugdan kini 09 June 2021 ug natapos niadtong 30 August 2021.


Gihimo kini nga irigasyon aron matabangan ang mga mag-uuma sa pagpatubig sa ilang mga tanom sa ilang kaumahan ilabi na sa panahon sa ting-init. Pwede usab kini nilang gamiton sa uban pa nila nga panginabuhian nga nanginahanglan ug tubig sama sa fish pond ug uban pa.


Dako kaayong kalipay sa mga membro sa Rural Improvement Club nga gipangunahan ni President Alona Tabaranza, diin aduna na gyod sila’y kakuhaan ug tubig para sa ilang tanom after 33 years.


“Kung wala’y tubig, wala’y pagkaon,” ang pamulong ni Gov. Kaka ilabi na sa mga uyamot nga mga mag-uuma nga anaa nalimutang sa nihit ug tubig. Mahitungod niini, mas nadasig si Gov. Kaka sa pagtabang kanila taliwala sa kahadlok nga ilang gibati aron barugan ang pangandoy nilang matubigan ang ilang kaumahan nga mao’y pinakauna nilang kapanguhaan sa panginabuhian. “Sa kalisod sa paningkamot nga inyong naagi-an kabalo ko nga ampingan ninyo ni kay ang kwarta para kini sa katawhan. Daghang salamat sa inspirasyon nga inyong gihatag diri sa barangay Rita Glenda, Basilisa,” dugang pa niya sa iyang mensahe.


Mapasalamaton usab si Gov. Kaka sa pipila ka mga Barangay Kagawad nga nisuporta sa maong proyekto bisan pa man sa mga babag nga ilang nasinati alang sa kaayuhan sa ilang ginsakupan.


Atol sa hamubo nga seremonya, mihangyo ang mga membro sa RIC nga mahatagan sila’g hose para sa ilang manokan. Gitahasan sila ni Gov. Kaka nga magpasa ug kopya sa barangay ordinansa ug resolution sa Sangguniang Panlalawigan nga ilang gihimo aron maprotektahan ang watershed nga mao’y tinubdan sa tubig sa ilang asosasyon isip tagaylo sa hose nga ilang gihangyo.


Anaa usab ang presensya ni Board Member Lyn Dialde (District 1) nga makanunayon sa paghatag ug suporta sa mga kalihukan sa Provincial Government ilabi na sa mga programa nga gihataga’g katumanan ni Gov. Kaka.

share

Share on facebook
Share on twitter